သွေးလွန်တုပ်ကွေးရောဂါ

သွေးလွန်တုပ်ကွေးရောဂါ

ကိုယ်သိပ်ချစ်တဲ့ တူတူမလေးတွေ ညီညီမလေးတွေရော ကိုယ့်ပတ်ဝန်းကျင်က ကလေးတွေ ဖျားတဲ့အခါ သွေးလွန် တုပ်ကွေးဖြစ်နေသလားလို့ စူးစမ်းမိတတ်ပါတယ်။ သွေးလွန်တုပ်ကွေးရောဂါအခြေအနေအချို့ကိုတော့သတိထားမိတာပေါ့လေ ကလေးတွေရောဂါအဆင့်မြင့်လာရင် ခန္ဓာကိုယ်အရေပြားမှာ အနီစက်လေးတွေပေါ်လာတာမျိုး၊ ခဏခဏ ပျို့တာအန်တာမျိုးတွေပေါ့လေ။ ခြင်ဆိုတဲ့အကောင် က ငှက်ဖျားရောဂါသာ မက သွေးလွန်တုပ်ကွေးရောဂါလို၊ ဆင်ခြေထောက်လိုရောဂါမျိုးတွေတောင် ဖြစ်စေသေးတော့တာ။

ဒီရောဂါနဲ့ပတ်သက်ပြီးစာအုပ်တစ်အုပ်ကို ဖတ်ဖြစ်တဲ့အခါ ကိုယ်သိတာလေးတွေကို သူငယ်ချင်းတို့ကိုပြန်ပြောပြချင်တာနဲ့ ပြန်လည်တင်ပြလိုက်ပါတယ်။

ဖတ်ပြီးတဲ့အခါ ကိုယ့်ပတ်ဝန်းကျင်မှာ သန့်သန့်ရှင်းရှင်းလေးဖြစ်အောင်နေထိုင်ပြုမူကြရင် ရောဂါဆိုတာကို ကာကွယ်ပြီး သားရောက်ရာ ရောက်ကြောင်းသိသွားနိုင်ပါတယ်လေ။

သွေးလွန်တုပ်ကွေးရောဂါကာကွယ်နှိမ်နင်းရေး

သွေးလွန်တုပ်ကွေး

သွေးလွန်တုပ်ကွေးရောဂါသည် သွေးလွန်တုပ်ကွေး ရောဂါပိုးရှိသော ခြင်ကျားကိုက်ခံရမှုမှရသော ရောဂါဖြစ်သည်။ အသက်(၁၅)နှစ်အောက် ကလေးများတွင်သာဖြစ်သည်။ အသက်(၃)နှစ်မှ (၈)နှစ်ကြား ကလေးများတွင် အဖြစ်များသည်။ တစ်နှစ်ပတ်လုံးရောဂါကူးစက်နိုင်သော်လည်း မိုးရာသီဖြစ်သော ဇွန်၊ဇူလိုင်၊သြဂုတ်လများတွင် ကူးစက်မှု အများဆုံးဖြစ်ပါသည်။

သွေးလွန်တုပ်ကွေးရောဂါ ဖြစ်တတ်သော မိုးရာသီတွင် ကလေးဖျားလျှင်စောင့်ကြည့်ပါ။ စတင်ဖျားသည့်နေ့မှ တတိယနေ့နှင့် ပဉ္စမနေ့အတွင်း ကလေးဖျားသည့်အခြေအနေ ဆိုးတတ်သဖြင့် လိုအပ်ပါက ကျန်းမာရေးဝန်ထမ်းများနှင့် ပြသပါ။

ရောဂါလက္ခဏာများ

- သွေးလွန်တုပ်ကွေးအဖျားသည် နာတာရှည်အဖျားမဟုတ်ပါ။

- ကလေးများ ဖျားနေစဉ် ပျို့ခြင်း၊အန်ခြင်းရှိနိုင်သည်။

- ဖျား၍ သုံးရက်မှ ငါးရက်ကြာလျှင်သွေးလန့်ပြီး အသက်အန္တရာယ်ဖြစ်နိုင်သည်။

သွေးလွန်တုပ်ကွေးရောဂါဟု ထင်ပါက ဘာစပရို၊အေပီစီ၊အနက်ဂျက်ဆင် မတိုက်ရပါ။ ပါရာစီတမောဆေးပေးနိုင်ပါသည်။

ခြင်လောက်လမ်း နှိမ်နင်းရေး

ဖုံး - ရေစည်ရေအိုးများကို ဖုံးအုပ်ထားပါ။

သွန် – ရေစည်ရေအိုးများအတွင်းမှ ရေများကို မကြာခဏ သွန်လဲပေးပါ။

ခပ် – ရေစည်ရေအိုးများရှိ ပိုးလောက်လမ်းများကို ခပ်ပစ်ပါ။

စစ် – ပိုးလောက်လန်းများ ကင်းရှင်းစေရန် စစ်၍ထည့်ပါ။

လောင်း - ကြောင်အိမ်အောက်ခံခွက်များထဲသို့ စက်ဆီ၊ဒီဇယ်ဆီ၊ ရေနံဆီနှင့် ဆားတစ်ခုခုလောင်းပါ။

ထောင်- ကလေးများ နေ့လည်အိပ်ချိန်တွင် ခြင်ထောင်ဖြင့်သိပ်ပါ။

လဲ – ပိုးလောက်လန်းများ မရှိစေရန် ရေသန့်ကိုလဲလှယ်ပါ။

ဖွင့် – အလင်းရောင်ရရှိစေရန် တံခါးများကို နေ့ပိုင်းတွင် ဖွင့်ထားပါ။

မြှုပ် – မိုးရေတင်နေသော ခွက်၊ တာယာစုတ်၊အိုးခြမ်းပဲ့၊ အုန်းမှုတ်ခွက် စသည်တို့ကို မြေမြှုပ်ပစ်ပါ။

ရှင်း - အိမ်တွင်း အိမ်ပြင် သန့်ရှင်းစွာထားပါ။

မှုတ် – ဆေးဖျန်း၊ ဆေးမှုတ်အဖွဲ့ကို ကူညီပါ။

သွေးလွန်တုပ်ကွေးရောဂါ ကာကွယ်ပါ။

(၁) မိုးရာသီအတွင်း အသက်(၃)နှစ်မှ (၁၄)နှစ်အထိ ကလေးငယ်များတွင် သွေးလွန်တုပ်ကွေးရောဂါ ဖြစ်ပွားတတ်ပါသည်။ သွေးလွန်တုပ်ကွေးရောဂါဖြစ်လျှင် ရင်သွေးငယ်များ အသက်ဆုံးပါးရသည်အထိ ဖြစ်နိုင်သဖြင့် မိမိတို့၏ ရင်သွေးများ ရောဂါဘယကင်းဝေးစေရန် သွေးလွန်တုပ်ကွေးရောဂါ ကြိုတင်ကာကွယ်ကြပါရန် နှိုးဆော်အပ်ပါသည်။

(၂) သွေးလွန်တုပ်ကွေးရောဂါသည် ရေကြည်ရေသန့်တွင် ပေါက်ပွားသော ခြင်ပုန်း ခြင်ကျား အကိုက်ခံရခြင်းကြောင့် ကူးစက်ပါသည်။ သို့ပါ၍ ခြင်ပုန်းခြင်ကျား မပေါက်ပွားစေရန်နှင့် မိမိတို့ ရင်သွေးများ ခြင်ကိုက်မခံရစေရန် အောက်ပါအတိုင်း ဆောင်ရွက်ကြပါရန် နှိုးဆော်အပ်ပါသည်။

လိုက်နာရမည့် အချက်များ-

- ရေစည်ရေအိုးများကို လုံခြုံစွာ ဖုံးအုပ်ထားပါ။

- ရေအိုး၊ညောင်ရေအိုးတို့မှ ရေကိုနေ့စဉ်လဲလှယ်ပေးပါ။

- ရေစည် ရေအိုးများရှိ ပိုးလောက်လန်းများအား ရေစစ်ဖြင့် ခပ်ထုတ်ပစ်ပါ။

- မိုးရေတင်နိုင်သော ဘူးခွံ၊ ပုံးခွံ၊တာယာစုတ်၊အိုးခြမ်းပဲ့ စသည်တို့ကို ဖယ်ရှားရှင်းလင်းပါ။

- မိမိတို့ အိမ်ရှေ့ အိမ်နောက်တို့မှ ရေမြောင်းများအား ရေစီးရေလာကောင်းအောင် ရှင်းလင်းပါ။ လိုအပ်ပါက စည်ပင်သာယာရေးအဖွဲ့၏ အကူအညီကိုယူပါ။

- အိမ်ပတ်ဝန်းကျင်ရှိ ရေ၀ပ်နိုင်သော မြေနိမ့်များကို ဖို့ပါ။

- အလင်းရရှိရန် တံခါးများကို နေ့ခင်းပိုင်းတွင် ဖွင့်ထားပါ။

- အိမ်တွင်း၊အိမ်ပြင်သန့်ရှင်းစွာထားပါ။

- ကလေးများ နေ့လည်အိပ်ချိန်တွင် ခြင်ထောင်ဖြင့် သိပ်ပါ။(အင်္ကျီလက်ရှည်၊ ဘောင်းဘီရှည်၊ထမီ၊ပုဆိုးစသည်တို့ ၀တ်ဆင်ထားပေးပါ။)

(၃) ကျန်းမာရေးဝန်ကြီးဌာနနှင့် ပူးပေါင်းပြီး ခြင်များမပေါက်ပွားစေရန် ဆေးဖျန်းခြင်း၊ အသိပညာပေးခြင်း၊ ကာကွယ်တားဆီးခြင်း လုပ်ငန်းများကို ဆောင်ရွက်ကြပါရန် တိုက်တွန်းနှိုးဆော်အပ်ပါသည်။

စာကြွင်း။ ။ ကျန်းမာရေးဝန်ကြီးဌာနထုတ် လက်ကမ်းစာစောင်ပါအချက်များကို မှီးငြမ်းထားပါသည်။